De triste cuer faire joyeusement,
Il m'est avis que c'est chose contraire;
Mais cils qui fait de joieus sentement,
Je di qu'il doit plus joieusement faire.
Et pour ce sont mi chant de rude affaire,
Qu'il sont tuit fait d'un cuer plus noir que meure,
Triste, dolent, qui larmes de sanc pleure.
S'en sui repris et blasmez durement.
Mais je ne say mon ouevre contrefaire,
Eins moustre ce que mes cuers scet et sent;
Et les meschiés dont j'ay plus d'une paire,
Voire de cent, si pert à mon viaire
Qu'ay l'esperit, où ma vie demeure,
Triste, dolent, qui larmes de sanc pleure.
Et pour ce à tous suppli tres humblement
Que de mes chans blasmer se vueillent taire,
Car je ne sçay ne puis faire autrement
Pour Fortune qui tent à ce deffaire
Qu'aim miex que moy; n'elle ne me lait plaire
Qu'à ciaus qui ont l'esperit à toute heure
Triste, dolent, qui larmes de sanc pleure.
Quant vrais amans aimme amoureusement,
De si vray cuer qu'il ne saroit meffaire,
Et sa dame a tel cuer que nullement
N'en puet mercy, doucuer ne grace attraire,
Cuer ne porroit avoir si debonnaire
Qui la liqueur dou sien à l'ueil ne queure,
Triste, dolent, qui larmes de sanc pleure.
Qu'Ardans Desir mourdrist secretement
Son triste cuer en doleur et en haire;
Pour ce ne fait pas si joliement
Com cilz qui joit et ou joie repaire
Et s'en li prent Souvenirs son repaire,
Quant il y vient, il le fait sans demeure
Triste, dolent, qui larmes de sanc pleure.
Qu'il ymagine et pense au grief tourment
Que sa dame li fait sentir et traire
Pour li servir et amer loyaument.
Helas! dolens, ci ha povre salaire;
Miex li vaurroit sa vie user au Quaire
Qu'en tel service, où cuers et corps deveure,
Triste, dolent, qui larmes de sanc pleure.
Certes, je di s'en quier jugement
Que, quant Amours un cuer destraint et maire,
Pour ce qu'avoir ne puet aligement
De sa dame qu'est franche et debonnaire,
Que li meschiés qu'Alixandres fist Daire
N'est pas si grans com cils qui li court seure,
Triste, dolent, qui larmes de sanc pleure.
Mais il doit miex faire et plus proprement
Que cils qu'Amours vuet de merci refaire,
Car Grans Desirs li enseigne et aprent
Et li donne matire et exemplaire
Et s'entremet de son oeuvre parfaire,
En douçeur fine et d'un son le couleure,
Triste, dolent, qui larmes de sanc pleure.
Mais cilz qui ha merci, a ce où il tent,
Si que Desirs à li plus ne s'apaire
Si ardemment ne si desiramment,
Eins amenrist et commence à retraire.
Et pour ce di, cui qu'il doie desplaire,
Que cilz fait miex qui d'amour goust saveure
Triste, dolent, qui larmes de sanc pleure.
